- २०८३ बैशाख १३ आइतबार
काठमाडौँ । इजरायलका प्रधानमन्त्री बेन्जामिन नेतन्याहुले लेबनानमा हिज्बुल्लाहका ठेगानामाथि कडा आक्रमण गर्न सेनालाई निर्देशन दिएका छन् । युद्धविराम तीन हप्ता थपिएको दुई दिनपछि उनले यस्तो आदेश दिएका हुन्।
निर्देशनपछि इजरायली सेनाले नयाँ आक्रमण सुरु गरेको छ। यसअघि शनिबार दक्षिणी लेबनानमा भएका हमलामा कम्तीमा ६ जनाको मृत्यु भएको थियो ।
सीमापार दुवै पक्षबाट भएका ताजा आक्रमणले युद्धविराम सम्झौतामाथि थप दबाब बढाएको छ। यसले युद्धविराम अझै कमजोर अवस्थामा रहेको देखाएको छ ।
वाशिङ्टनमा दुवै देशका प्रतिनिधिबीच भएको वार्तापछि बिहीबार युद्धविराम अवधि थपिएको थियो । यो सम्झौता पूर्ण रूपमा आक्रमण रोक्नेभन्दा पनि हिंसा कम गर्ने उद्देश्यमा सीमित रहेको बताइएको छ ।
शनिबार नबातियेह जिल्लाको योहमोर अल शकिफ क्षेत्रमा एक ट्रक र मोटरसाइकलमाथि भएको इजरायली आक्रमणमा ४ जनाको मृत्यु भएको लेबनानको स्वास्थ्य मन्त्रालयले जनाएको छ ।
यस्तै बिन्त जुबैल जिल्लाको सफद अल बत्तीख क्षेत्रमा भएको अर्को आक्रमणमा २ जनाको मृत्यु हुनुका साथै १७ जना घाइते भएका छन् ।
इजरायल रक्षा बलले शनिबार हतियार बोकेको सवारीमा रहेका हिज्बुल्लाहका ३ सदस्यलाई मारिएको दाबी गरेको छ। साथै मोटरसाइकलमा रहेका अर्का एक सदस्य पनि मारिएको जनाएको छ ।
2026-04-26-01-02-18_1920x1080_50.webp)
