- २०८३ बैशाख ५ शनिबार
काठमाडौँ । प्रहरी महानिरीक्षक दानबहादुर कार्कीले नागरिक केन्द्रित सेवा प्रवाहलाई प्राथमिकतामा राख्दै काम गर्न प्रहरी कर्मचारीलाई निर्देशन दिएका छन्। बुधबार भर्चुअल माध्यमबाट दिएको निर्देशन सम्बोधनमा उनले नागरिकका समस्या र गुनासोलाई छिटो र प्रभावकारी रूपमा समाधान गर्न जोड दिएका हुन् ।
उनले प्रहरी कार्यालयमा आउने सेवाग्राहीलाई छिटो सेवा दिनुका साथै बिचौलियाको प्रभाव अन्त्य गर्न कडा निर्देशन दिए । कुनै पनि प्रलोभन वा दबाबमार्फत काम गराउने गतिविधिमा संलग्न व्यक्तिलाई तुरुन्त कानुनी दायरामा ल्याउनुपर्ने उनले बताए । साथै, प्रत्येक कार्यालयमा नागरिक सहजकर्ता राखी सेवाग्राहीलाई सरल सेवा दिन र प्रगति विवरण एसएमएसमार्फत जानकारी गराउनुपर्ने पनि निर्देशन दिए ।
प्रहरी महानिरीक्षक कार्कीले शून्य सहनशीलताको नीति अपनाउँदै पारदर्शी र निष्पक्ष सेवा दिन सबै प्रहरी कर्मचारी प्रतिबद्ध हुनुपर्ने बताए । अपराध अनुसन्धानलाई तथ्यमा आधारित र पारदर्शी बनाउनुपर्ने उल्लेख गर्दै सीमा क्षेत्रमा हुने अपराध, तस्करी, गुण्डागर्दी तथा प्राकृतिक स्रोतको दोहन नियन्त्रणमा कडाइ गर्न निर्देशन दिए ।
उनले सबै प्रहरी कर्मचारीले अनुशासन, इमानदारी र व्यावसायिकता कायम गर्दै जिम्मेवारी प्रभावकारी रूपमा निर्वाह गर्नुपर्ने बताए । आपराधिक घटना हुन नदिन योजना बनाएर सुरक्षा व्यवस्था मिलाउन, सवारी दुर्घटना घटाउन सम्बन्धित निकायसँग समन्वय गर्न र जनचेतना बढाउन पनि उनले जोड दिए ।
सम्भावित विपद्का घटनामा सतर्क रहनुपर्ने बताउँदै उनले पूर्वतयारी र अभ्यासलाई प्राथमिकतामा राख्न निर्देशन दिए । विपद्को समयमा उपलब्ध स्रोतसाधनको अधिकतम प्रयोग गरी उद्धार कार्य प्रभावकारी बनाउनुपर्ने उनको भनाइ छ। भीड नियन्त्रणमा विगतका कमजोरी सुधार गर्दै आवश्यक अभ्यास गर्न र जिम्मेवारी पूरा गर्दा सामाजिक सञ्जाल प्रयोगमा पनि सचेत रहन उनले आग्रह गरे ।
कार्यक्रममा अपराध अनुसन्धान विभाग प्रमुख अतिरिक्त महानिरीक्षक सुशील सिंह राठौर र कार्य विभाग प्रमुख अतिरिक्त महानिरीक्षक उमाप्रसाद चतुर्बेदीले पनि समसामयिक विषयमा निर्देशन दिएका थिए । कार्यक्रममा विभिन्न प्रदेश, जिल्ला तथा मातहत इकाइका प्रहरी प्रमुख तथा प्रतिनिधिहरूको भर्चुअल सहभागिता रहेको थियो ।
