- २०८३ बैशाख ६ आइतबार
काठमाडौँ । नेकपा एमालेका अध्यक्ष केपी शर्मा ओलीले फागुन २१ आफ्नो जीवनका दुई विशेष संयोग जोडिएको दिन भएको बताएका छन् ।
सामाजिक सञ्जालमार्फत ओलीले आज सुखानी शहीद दिवस पनि रहेको र यही दिन छ वर्षअघि आफ्नो दोस्रो पटक मिर्गौला प्रत्यारोपण भएको स्मरण गरेका हुन् । यी दुवै दिन आफू मृत्युको मुखबाट फर्किएर नयाँ जीवन पाएको दिनजस्तै भएको उनले उल्लेख गरेका छन् ।
ओलीले झापा आन्दोलनले निरंकुश व्यवस्थाविरुद्ध विद्रोहको आवाज उठाएको भन्दै सो क्रममा आफूहरूलाई जेल हालिएको पनि स्मरण गरेका छन् । त्यस्तै त्यही आन्दोलनका क्रममा रामनाथ दाहाल, नेत्र घिमिरे, वीरेन राजवंशी, कृष्ण कुइँकेल र नारायण राजवंशीलाई जेल सार्ने बहानामा सुखानीको जंगलमा लगेर हत्या गरिएको उनले बताएका छन् ।
उनले आफूलाई पनि त्यतिबेला जेल सार्ने बहानामा लगिँदा मृत्युको मुखबाट फर्किएको स्मरण गर्दै पछि १४ वर्ष कठोर कारावास बिताएको उल्लेख गरेका छन् ।
देशलाई लोकतन्त्रको उज्यालो बिहानतर्फ लैजान बलिदान दिएका ती पाँच अमर शहीदप्रति उनले भावपूर्ण श्रद्धाञ्जली अर्पण गरेका छन् । साथै फागुन २१ आफूले कहिल्यै नबिर्सने दिन भएको पनि ओलीले उल्लेख गरेका छन् ।
